सन्तोष बोहरा, मनाङ ।  मनाङको नार्पाभूमि गाउँपालिका–५ स्थित हिमलुङ हिमालको बेस क्याम्पमा गएको हिमपहिरोमा परी सिन्धुपाल्चोक त्रिपुरासुन्दरी गाउँपालिका वडा नम्बर ६ टेकान्पुरका उर्खध्वज बोहरा (लक्ष्मी) को पनि मृत्यु भएको छ। हिमलुङ हिमाल आरोहणका लागि बेस क्याम्पमा तयारी अवस्थामा रहेका नेपाली कामदार तथा सपोर्ट स्टाफमध्ये बोहरा किचन प्रमुखका रूपमा कार्यरत रहेको बुझिएको छ।

गत २०८३ असोज ११ गते बिहान हिमलुङ हिमालको बेस क्याम्प क्षेत्रमा अचानक हिमपहिरो खसेपछि त्यहाँ रहेका नेपाली कामदार तथा सपोर्ट स्टाफ प्रभावित भएका थिए । घटनाका बेला बेस क्याम्पमा १६ जना नेपाली कामदार तथा सपोर्ट स्टाफ आरोहणसम्बन्धी तयारीमा रहेको बताइएको छ।

हिमपहिरो खसेलगत्तै उद्धार तथा खोजी कार्य सुरु गरिएको थियो । प्रारम्भिक चरणमा दुई जनाको शव फेला परेको थियो । त्यसपछि नेपाली सेना, नेपाल प्रहरी तथा स्थानीय उद्धार टोलीले प्रतिकूल मौसम र कठिन भौगोलिक अवस्थाबीच खोजी कार्यलाई निरन्तरता दिएका थिए । खोजीका क्रममा २०८३ असोज १५ गतेसम्म १५ जनाको शव फेला परेको विवरण सार्वजनिक भएको छ । घटनामा अझै एक जना बेपत्ता रहेको अनुमान गरिएको छ।

हिमलुङ हिमालको बेस क्याम्प रहेको क्षेत्र उच्च हिमाली भूभागमा पर्ने भएकाले उद्धार तथा खोजी कार्य सहज हुन सकेको छैन । लगातारको हिमपात, चिसो मौसम, हिमपहिरोको जोखिम र कठिन भौगोलिक अवस्थाका कारण उद्धार टोलीले जोखिम मोलेर काम गर्नुपरेको छ । घटनास्थलबाट फेला परेका शवलाई सुरक्षित स्थानमा ल्याउने, पहिचान गर्ने तथा आवश्यक कानुनी प्रक्रिया पूरा गर्ने काम अघि बढिरहेको छ ।

बोहरा हिमलुङ हिमाल आरोहण टोलीसँग आबद्ध भएर किचन प्रमुखका रूपमा काम गर्दै आएका थिए। आरोहण तथा पर्वतीय पर्यटनका लागि आवश्यक खाना तथा अन्य व्यवस्थापनमा उनी जिम्मेवार रहेको बताइएको छ। रोजगारीका सिलसिलामा उच्च हिमाली क्षेत्रमा पुगेका बोहराको हिमपहिरोमा परी ज्यान गएपछि उनका परिवार, आफन्त, सहकर्मी तथा शुभेच्छुकहरू शोकमा परेका छन्।

हिमाली क्षेत्रमा काम गर्ने कामदार तथा सहयोगी जनशक्तिले आरोहण गतिविधिलाई सहज बनाउन महत्वपूर्ण भूमिका निर्वाह गर्दै आएका छन् । तर उच्च हिमाली क्षेत्रमा मौसममा आउने अचानक परिवर्तन, हिमपहिरो, हिमस्खलन तथा अन्य प्राकृतिक जोखिमका कारण उनीहरूको सुरक्षामा निरन्तर चुनौती रहने गरेको छ । हिमलुङ हिमालमा भएको पछिल्लो घटनाले पनि आरोहण गतिविधिमा संलग्न कामदार तथा सहयोगी जनशक्तिको सुरक्षा व्यवस्थापनलाई थप संवेदनशील बनाउनुपर्ने आवश्यकता देखाएको छ ।

घटनापछि सम्बन्धित निकायले उद्धार, खोजी तथा शव व्यवस्थापनलाई प्राथमिकतामा राख्दै काम गरिरहेका छन् । बेपत्ता रहेका व्यक्तिको खोजी कार्यसमेत जारी रहेको बताइएको छ । फेला परेका शव आवश्यक प्रक्रिया पूरा गरी सम्बन्धित परिवार तथा आफन्तसम्म पुर्‍याउने तयारी भइरहेको छ ।

सिन्धुपाल्चोकका बोहराको निधनको खबरले जिल्लामा समेत दुःख र शोकको अवस्था सिर्जना भएको छ। परिवारले आफ्नो सदस्य गुमाएको पीडाका बीच शवको पहिचान तथा आवश्यक प्रक्रिया पूरा गरी यथाशीघ्र घर ल्याइदिने अपेक्षा गरेका छन् । हिमलुङ हिमालमा भएको यस घटनामा ज्यान गुमाउने सबैप्रति स्थानीयवासी, आफन्त तथा शुभेच्छुकहरूले श्रद्धाञ्जली व्यक्त गरेका छन् ।

बोहराको शवलाइ आज शुक्रबार काठमाडौं पठाइने र आजनै दाहसंस्कार गरिने पारिवारिक स्रोतले जनाएको छ । सरकारले मौसमको खराबीको जानकारी दिदाँदिदै सम्बन्ध ट्राभल एजेन्सीले सो क्षेत्रमा पर्यटकलाइ लिएर गएकोमा भने प्रश्न उठेको छ ।