औद्योगिक गाँजाखेतीलाई कानुनी मान्यता दिन पर्ने धारणा

काठमाडौं , ७ कात्तिक । औषधीय तेल र कपडा उत्पादनमार्फत निर्यात बढाउन तथा किसानको आम्दानी र युवाको रोजगारी सिर्जना गर्न सकिने धारणा आएको छ । नेपाल चेम्बर अफ कमर्सका निवर्तमान अध्यक्ष राजेन्द्र मल्लले गाँजाखेतीलाई व्यवस्थित र कानुनी दायराभित्र ल्याएर औद्योगिक उत्पादन तथा निर्यात प्रवर्द्धन गर्नुपर्ने धारणा व्यक्त गरेका हुन्।

नेपालमा औद्योगिक गाँजाखेतीलाई कानुनी मान्यता दिई तत्काल कार्यान्वयनमा ल्याउनुपर्ने माग उठेको छ। मल्लका अनुसार औद्योगिक प्रयोजनका लागि गाँजाखेतीलाई प्रोत्साहन गर्न सके नेपालले कृषि, औषधि तथा कपडा उद्योगका क्षेत्रमा नयाँ सम्भावना सिर्जना गर्न सक्छ। गाँजाबाट औषधीय एक्स्ट्र्याक्ट तेल तथा विभिन्न प्रकारका कपडा उत्पादन गरी अन्तर्राष्ट्रिय बजारमा निर्यात गर्न सके मुलुकको अर्थतन्त्रलाई थप मजबुत बनाउन सहयोग पुग्ने उनको भनाइ छ।

उनले औद्योगिक गाँजाखेतीलाई कानुनी मान्यता दिँदै यसको उत्पादन, प्रशोधन, बजारीकरण र निर्यातसम्मका गतिविधिलाई व्यवस्थित बनाउनुपर्ने आवश्यकतामा जोड दिएका छन्। यसबाट परम्परागत कृषिमा निर्भर किसानले आम्दानीका थप अवसर प्राप्त गर्न सक्ने र कृषि क्षेत्रमा लगानी विस्तार हुने अपेक्षा गर्न सकिन्छ।

त्यस्तै, गाँजामा आधारित उद्योग स्थापना तथा सञ्चालन हुँदा युवाका लागि रोजगारीका नयाँ अवसर सिर्जना हुन सक्ने देखिन्छ। उत्पादन तथा प्रशोधन उद्योगको विकासले स्थानीय स्तरमा आर्थिक गतिविधि बढाउनुका साथै औद्योगिक विकास र उद्यमशीलतालाई समेत प्रोत्साहन गर्न सक्छ।

नेपालले प्राकृतिक स्रोत र कृषि सम्भावनाको उपयोग गर्दै निर्यातमुखी उद्योग विकास गर्नुपर्ने बहस भइरहेका बेला मल्लको यो धारणा आएको हो। औद्योगिक गाँजाबाट उत्पादित वस्तुको अन्तर्राष्ट्रिय बजारमा पहुँच विस्तार गर्न सके विदेशी मुद्रा आर्जन बढाउनसमेत मद्दत पुग्न सक्छ।

यद्यपि, औद्योगिक गाँजाखेती कार्यान्वयनका लागि स्पष्ट कानुनी व्यवस्था, उत्पादनको नियमन, गुणस्तर परीक्षण, अनुसन्धान तथा बजार व्यवस्थापन आवश्यक हुन्छ। लागूऔषधसम्बन्धी जोखिम नियन्त्रण गर्दै औद्योगिक प्रयोजनलाई स्पष्ट रूपमा छुट्याउन सके गाँजामा आधारित उद्योग नेपालको आर्थिक विकासको सम्भावित क्षेत्र बन्न सक्छ।